Видеокузатув тизими Тошкент кўчаларида тиқилинчларга сабаб бўлди

Тошкентда йўл ҳаракати қоидалари бузилишини қайд қилиш видеотизимининг ишга тушиши пойтахтнинг марказий қисмида тиқилинчлар юзага келишига сабаб бўлди. Бу ҳақда «Sof.uz» хабар бермоқда.

Sputnik мухбирлари пойтахтнинг энг гавжум кўчаларида бўлишиб, ҳайдовчиларнинг йўл ҳаракати қоидаларига нисбатан муносабати қанчалик ўзгарганини кузатдилар. Кузатувларга кўра, бирданига хулоса чиқариш қийин, лекин вазият яхши томонга ўзгараётгани аниқ.

Энди аксарият ҳайдовчилар светофорнинг ўчиб-ёнаётган яшил ёки сариқ чироғида ғизиллаб ўтиб кетишга уринишмаяпти. Светофорларда ортда турган ҳайдовчиларнинг сариқ чироқ ёнганида жазавага тушганча сигнал чалишлари ҳам аста-секин ўтмишга равона бўлмоқда.

Светофор олдидаги тўхташ чизиғига ҳам ҳайдовчилар эҳтиёткорлик билан яқинлашишмоқда. Шаҳар марказидаги икки соатлик сайримиз давомида стоп-чизиқни босиб ўтган атиги 20тача машинага кўзимиз тушди. Бунда айримлар ўзи хоҳлаган жойдан бурилиб ҳам кетди. Чамаси, бу ҳайдовчилар ахборот бўшлиғидан тушиб қолишган ва шаҳарда камералар ишга тушганидан бехабарга ўхшайди. Нима ҳам дердик, улар томон «бахт мактуби» йўл олган бўлса ажабмас.

Энг қизиғи, ҳайдовчиларнинг ўта тартибли бўлиб қолишлари шаҳар марказида катта тиқилинчларни юзага келтирди. Бу айниқса, Ц-5, «Панорама» кинотеатри, «Бунёдкор» стадиони, Шуҳрат ва «Минор» бекати чорраҳалари, «Пойтахт» бизнес маркази яқинида кузатилди.

Сабаби эса оддий — ҳайдовчиларнинг шаҳар ичидаги ўртача тезликлари пасайди, светофорнинг сариқ ва қизил чироқларида тўхтайдиган бўлишди, бу албатта ҳаракатланиш тезлигини сусайтирди, лекин хавфсизликни таъминлади.

Умид қиламизки, пойтахт кўчаларида хавфсизликни таъминлаш бўйича амалга оширилаётган жараён давом этади.